महाराष्ट्रातील २९ महानगरपालिकांच्या निवडणुकांसाठी गुरुवार, दिनांक १५ जानेवारी रोजी मतदान प्रक्रिया पार पडणार आहे. या पार्श्वभूमीवर राज्य शासनाने त्या दिवशी संबंधित महानगरपालिका निवडणूक क्षेत्रात सार्वजनिक सुट्टी जाहीर केली असल्याची अधिकृत अधिसूचना प्रसिद्ध केली आहे.
या अधिसूचनेनुसार, राज्य शासनाच्या प्रशासकीय नियंत्रणाखालील सर्व शासकीय कार्यालये, निमशासकीय कार्यालये, महामंडळे, मंडळे तसेच सार्वजनिक उपक्रमांना ही सुट्टी लागू राहणार आहे. याशिवाय केंद्र शासनाची कार्यालये, बँका व तत्सम आस्थापनांनाही ही सार्वजनिक सुट्टी लागू राहील, असे स्पष्ट करण्यात आले आहे.
विशेष बाब म्हणजे, संबंधित महानगरपालिका मतदारसंघातील मतदार जर कामानिमित्त बाहेर असतील, तरीही त्यांनाही ही सार्वजनिक सुट्टी लागू राहणार असल्याचे अधिसूचनेत नमूद करण्यात आले आहे, जेणेकरून प्रत्येक मतदाराला मतदानाचा हक्क बजावता येईल.
ज्या महानगरपालिकांमध्ये ही सार्वजनिक सुट्टी लागू राहील त्यामध्ये — बृहन्मुंबई, ठाणे, नवी मुंबई, उल्हासनगर, कल्याण-डोंबिवली, भिवंडी-निजामपूर, मीरा-भाईंदर, वसई-विरार, पनवेल, नाशिक, मालेगाव, अहिल्यानगर, जळगाव, धुळे, पुणे, पिंपरी-चिंचवड, सोलापूर, कोल्हापूर, इचलकरंजी, सांगली-मिरज-कुपवाड, छत्रपती संभाजीनगर, नांदेड-वाघाळा, परभणी, जालना, लातूर, अमरावती, अकोला, नागपूर आणि चंद्रपूर यांचा समावेश आहे.
राज्य निवडणूक यंत्रणा आणि प्रशासनाच्या वतीने नागरिकांना लोकशाहीच्या या महत्त्वाच्या प्रक्रियेत सक्रिय सहभाग नोंदवण्याचे आवाहन करण्यात आले आहे. प्रत्येक मतदाराने आपल्या मताचा अधिकार बजावून लोकशाही मजबूत करण्यासाठी पुढे यावे, असे प्रशासनाने स्पष्टपणे सांगितले आहे.