महाराष्ट्र राज्य माध्यमिक व उच्च माध्यमिक शिक्षण मंडळाने बारावी अर्थात उच्च माध्यमिक प्रमाणपत्र परीक्षा (HSC) २०२६ संदर्भातील महत्त्वाची माहिती अधिकृतरीत्या जाहीर केली आहे. मंडळाच्या घोषणेनुसार, बारावीची लेखी परीक्षा १० फेब्रुवारी २०२६ पासून सुरू होणार असून १८ मार्च २०२६ पर्यंत चालणार आहे.
या परीक्षेस बसणाऱ्या विद्यार्थ्यांसाठी एक महत्त्वाची सूचना देण्यात आली असून, हॉलतिकीटे उद्यापासून ऑनलाइन पद्धतीने उपलब्ध करून देण्यात येणार आहेत. विद्यार्थ्यांनी थेट वेबसाइटवरून हॉलतिकीट डाउनलोड न करता संबंधित शाळा किंवा ज्युनिअर कॉलेजमार्फतच हॉलतिकीट प्राप्त करायचे आहेत.
राज्य मंडळाने स्पष्ट केले आहे की, संबंधित शाळा व कनिष्ठ महाविद्यालयांनी विद्यार्थ्यांची हॉलतिकीटे ऑनलाइन डाउनलोड करून त्यांचे प्रिंटआउट काढावेत आणि विद्यार्थ्यांना वितरित करावेत. प्रत्येक हॉलतिकिटावर मुख्याध्यापक किंवा प्राचार्य यांची सही व शाळेचा अधिकृत शिक्का असणे अनिवार्य आहे. फोटो असलेल्या हॉलतिकिटावर शिक्का व स्वाक्षरी नसल्यास ते ग्राह्य धरले जाणार नाही.
परीक्षेच्या दिवशी विद्यार्थ्यांकडे वैध हॉलतिकीट असणे बंधनकारक असून त्याशिवाय परीक्षागृहात प्रवेश दिला जाणार नाही, असे मंडळाने स्पष्ट केले आहे.
दरम्यान, लेखी परीक्षेपूर्वी प्रात्यक्षिक, श्रेणी, तोंडी परीक्षा, अंतर्गत मूल्यमापन तसेच एनएससीक्यूएफ अंतर्गत व्यावसायिक अभ्यासक्रमांच्या प्रात्यक्षिक परीक्षा २३ जानेवारी ते ९ फेब्रुवारी २०२६ या कालावधीत पार पडणार आहेत. यामध्ये माहिती तंत्रज्ञान व सामान्यज्ञान विषयांच्या प्रात्यक्षिकांचाही समावेश असेल.
फेब्रुवारी–मार्च २०२६ मधील बारावी परीक्षा पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण या नऊ विभागीय मंडळांमार्फत आयोजित केली जाणार आहे.
शिक्षण मंडळाने विद्यार्थ्यांना आणि पालकांना आवाहन केले आहे की, त्यांनी परीक्षा संदर्भातील सर्व अधिकृत सूचना फक्त मंडळाच्या अधिकृत माध्यमांतूनच पाहाव्यात आणि अफवांवर विश्वास ठेवू नये. योग्य वेळेत हॉलतिकीट प्राप्त करून सर्व नियमांचे पालन करण्याचे आवाहन करण्यात आले आहे.