नाशिक महानगरपालिका सार्वत्रिक निवडणुकीच्या पार्श्वभूमीवर निवडणूक आचारसंहिता प्रभावीपणे अंमलात आणण्यासाठी महापालिकेच्या जनसंपर्क विभागामार्फत स्वतंत्र आचारसंहिता तक्रार निवारण कक्ष सुरू करण्यात आला आहे. या कक्षामार्फत निवडणूक काळात होणाऱ्या आचारसंहिता उल्लंघनांवर लक्ष ठेवले जाणार असून प्राप्त तक्रारींवर तातडीने कार्यवाही केली जाणार आहे.
हा तक्रार निवारण कक्ष नाशिक महापालिकेच्या मुख्यालयातील राजीव गांधी भवन येथे कार्यान्वित करण्यात आला आहे. निवडणूक प्रक्रियेत पारदर्शकता, निष्पक्षता आणि शांतता राखण्यासाठी नागरिकांचा सहभाग अत्यंत महत्त्वाचा असल्याचे महापालिकेने स्पष्ट केले आहे.
यासाठी नागरिकांना विविध माध्यमांतून तक्रार नोंदविण्याची सुविधा उपलब्ध करून देण्यात आली आहे. नागरिक ई-मेल, व्हॉट्सअॅप, मोबाईल संदेश किंवा थेट फोन कॉलद्वारे निवडणूक आचारसंहितेशी संबंधित तक्रारी नोंदवू शकतात. प्राप्त तक्रारींची तपासणी करून योग्य ती तातडीची कार्यवाही केली जाईल, असे प्रशासनाने सांगितले आहे.
नाशिक महानगरपालिका क्षेत्रातील सर्व नागरिकांना आवाहन करण्यात येत आहे की, निवडणूक आचारसंहितेचे कोणतेही उल्लंघन आढळल्यास विलंब न करता संबंधित माध्यमांद्वारे तक्रार नोंदवावी. नागरिकांच्या सहकार्यामुळे निवडणूक प्रक्रिया अधिक शांततापूर्ण, निष्पक्ष आणि पारदर्शक पद्धतीने पार पडण्यास मदत होणार आहे, असे महापालिकेने नमूद केले आहे.