नाशिक महानगरपालिका निवडणुकीच्या पार्श्वभूमीवर नागरिकांचा सहभाग वाढावा आणि मतदानाची टक्केवारी अधिक व्हावी यासाठी नाशिक महानगरपालिकेच्या वतीने ‘वोटकर नाशिककर’ ही विशेष जनजागृती मोहीम सुरू करण्यात आली आहे. या मोहिमेच्या माध्यमातून प्रत्येक नागरिकाने आपला मतदानाचा हक्क बजावावा, यासाठी प्रशासन आणि पोलिस यंत्रणा संयुक्तपणे प्रयत्न करत आहेत.
शहरातील विविध भागांत उभारण्यात आलेल्या जनजागृती उपक्रमांमध्ये नागरिकांचा उत्स्फूर्त सहभाग पाहायला मिळत आहे. याच अंतर्गत तयार करण्यात आलेल्या आकर्षक सेल्फी पॉईंटवर नागरिक स्वतःचे फोटो काढून सोशल मीडियावर शेअर करत मतदानाचा संदेश पसरवत आहेत. यामुळे तरुणाईसह सर्व वयोगटांमध्ये मतदानाबाबत सकारात्मक वातावरण निर्माण होत आहे.
नाशिक शहर पोलीस आयुक्त संदीप कर्णिक यांनी मनपा पूर्व विभागीय कार्यालयास भेट देत या मोहिमेला पाठिंबा दिला. त्यांनी नागरिकांना कायदा व सुव्यवस्था राखत निर्भय, सुरक्षित आणि पारदर्शक वातावरणात मतदान करण्याचे आवाहन केले. त्यांनी स्वतःही सेल्फी पॉईंटवर फोटो काढून ‘वोटकर नाशिककर’ मोहिमेत सहभाग नोंदवला आणि इतरांनाही मतदानासाठी प्रेरित केले.
दरम्यान, नाशिक महानगरपालिका आयुक्त तथा प्रशासक आणि मुख्य निवडणूक निर्णय अधिकारी मनिषा खत्री यांनीही नागरिकांना मतदानाचे महत्त्व समजावून सांगत “प्रत्येक मत महत्त्वाचे आहे, प्रत्येक नाशिककराने मतदान केलेच पाहिजे” असे स्पष्ट आवाहन केले आहे. लोकशाही बळकट करण्यासाठी नागरिकांचा सक्रिय सहभाग अत्यावश्यक असून मतदान हा त्याचा सर्वात प्रभावी मार्ग असल्याचे त्यांनी सांगितले.
प्रशासनाच्या या उपक्रमामुळे नागरिकांमध्ये जागृती वाढत असून, यंदाच्या निवडणुकीत विक्रमी मतदान होईल अशी अपेक्षा व्यक्त केली जात आहे. ‘वोटकर नाशिककर’ मोहिमेच्या माध्यमातून नाशिक शहरात लोकशाही प्रक्रियेबाबत सकारात्मक संदेश पोहोचत असून ही मोहीम इतर शहरांसाठीही आदर्श ठरण्याची शक्यता आहे.