नाशिक महानगरपालिकेच्या आगामी निवडणुकीसाठी उमेदवारी अर्ज विक्री व स्वीकारण्याच्या प्रक्रियेला मंगळवारपासून सुरुवात झाली असून, पहिल्याच दिवशी इच्छुक उमेदवारांची मोठी गर्दी पाहायला मिळाली. प्रशासनाकडून जाहीर करण्यात आलेल्या आकडेवारीनुसार तब्बल १७६३ उमेदवारी अर्जांची विक्री पहिल्याच दिवशी झाली आहे.
विशेष म्हणजे, प्रभाग क्रमांक तीनमधून एका इच्छुक उमेदवाराने अधिकृतरीत्या अर्ज दाखल केला आहे. मात्र, बहुतांश इच्छुकांनी शुभमुहूर्त पाहून अर्ज दाखल करण्याचा निर्णय घेतल्यामुळे पुढील काही दिवसांत अर्ज भरण्याचा वेग अधिक वाढण्याची शक्यता आहे.
राजकीय पक्षांमध्ये उमेदवारीसाठी मोठी स्पर्धा पाहायला मिळत आहे. भाजपकडून सुमारे १२०० इच्छुकांनी उमेदवारीसाठी मुलाखती दिल्या आहेत. तसेच शिंदेसेना, ठाकरे गट आणि शरद पवार गटाकडूनही मोठ्या संख्येने इच्छुक पुढे आले आहेत. त्यामुळे प्रत्येक पक्षासमोर तिकीट वाटप करताना अंतर्गत असंतोष टाळण्याचे मोठे आव्हान उभे राहणार आहे.
या आकडेवारीवरून यंदाची निवडणूक अत्यंत अटीतटीची होण्याची शक्यता व्यक्त केली जात आहे. अनेक इच्छुकांना अधिकृत उमेदवारी न मिळाल्यास ते अपक्ष म्हणून निवडणूक लढवू शकतात, त्यामुळे निवडणुकीनंतर राजकीय समीकरणे बदलण्याची शक्यता आहे.
प्रशासनाने अर्ज स्वीकारण्यासाठी व छाननीसाठी स्वतंत्र कक्ष स्थापन केले असून सकाळी ११ ते दुपारी ३ या वेळेत अर्ज स्वीकारले जात आहेत. कोणतीही अनुचित घटना घडू नये यासाठी सर्व ठिकाणी पोलिस बंदोबस्त ठेवण्यात आला आहे.